Өдөр тутмын амьдралд иргэд зээл, түрээс, худалдах, худалдан авах зэрэг олон төрлийн гэрээ байгуулдаг. Гэвч зарим нийтлэг алдаа нь маргаан үүсэх, мөнгөө алдах, шүүхэд хүрэх эрсдэлийг нэмэгдүүлдэг. Тэгвэл ямар алдааг хамгийн түгээмэл гаргадаг вэ?
1. Амаар тохиролцоод орхих
"Танил хүн болохоор бичиг хийх хэрэггүй."
Энэ бол хамгийн түгээмэл алдаа.
Иргэний эрх зүйн маргаанд амаар тохиролцсон зүйлээ нотлох нь олон тохиолдолд хүндрэлтэй байдаг.
2. Гэрээг уншихгүй гарын үсэг зурах
Иргэд торгууль, хугацаа, төлбөрийн нөхцөлийг уншилгүй гарын үсэг зурдаг. Дараа нь маргаан гардаг.
3. Төлбөрөө бэлнээр өгөөд баримт авахгүй байх
Шилжүүлэг эсвэл баримт нь дараа нь нотлох баримт болдог.
4. Огноо, хугацаагаа тодорхой бичдэггүй
"Дараа өгнө." "Удалгүй төлнө."Ийм үг гэрээнд байх ёсгүй.
5. Өөртөө нэг хувь үлдээдэггүй
Гэрээ байгуулсан бол тал бүр нэг хувьтай байх ёстой. Гэрээ бол зөвхөн том компаниудын хэрэг биш. Өдөр тутмын жижиг тохиролцоо ч ирээдүйд маргаан үүсгэж болзошгүй тул аливаа гэрээг ойлгож, нягталж байгуулдаг байх нь өөрийн эрх ашгийг хамгаалах хамгийн эхний алхам юм.
Та бүхэнд жишээ болгон 2026 оны 06 сарын 19 өдөр Улсын Дээд Шүүхээс гаргасан шийдвэрийг танилцуулъя
Монгол Улсын Дээд шүүх 2026 онд шийдвэрлэсэн нэгэн хэрэгт орон сууц худалдахтай холбоотой маргааныг хэлэлцэхдээ анхан болон давж заалдах шатны шүүхүүд нотлох баримтыг бүрэн бүрдүүлээгүй, зарим хүсэлтийг шийдвэрлэлгүй орхигдуулсан гэж үзэн өмнөх шийдвэрүүдийг хүчингүй болгож, хэргийг дахин хэлэлцүүлэхээр буцаасан байна.
Тухайн хэрэгт талууд:
-орон сууцны төлбөр бүрэн төлөгдсөн эсэх,
-гэрээний хүчин төгөлдөр байдал,
-захидал харилцаа зэрэг нотлох баримтыг хэрхэн үнэлэх талаар маргажээ. Дээд шүүх эдгээр асуудлыг бүрэн тодруулалгүйгээр хэрэг шийдвэрлэсэн нь процессын алдаа болсон гэж дүгнэсэн байна.
Иргэд юуг анхаарах вэ?
✔️ Гэрээ байгуулахдаа бүх төлбөрөө баримтжуулах.
✔️ Мессеж, и-мэйл, шилжүүлгийн баримтаа хадгалах.
✔️ Маргаан гарвал нотлох баримт бүрдүүлэх хүсэлтээ тухай бүр гаргах.
Энэхүү нийтлэл нь иргэдэд зориулсан ерөнхий мэдээлэл бөгөөд тухайн хэрэг бүрийн нөхцөл байдал өөр байж болох тул шаардлагатай тохиолдолд хуульч, өмгөөлөгчөөс мэргэжлийн зөвлөгөө авахыг зөвлөж байна.